pŵer gofalwyr maeth gwrywaidd

Mae maethu’n newid bywydau, ac yn Sir y Fflint, gall dynion fod yn rhan hanfodol o’r newid hwnnw. Yr hyn nad ydym ni’n ei amlygu ddigon o hyd yw’r effaith mae gofalwyr maeth gwrywaidd yn ei chael bob dydd. P’un a ydynt yn rhan o grŵp sy’n maethu neu’n camu ymlaen ar eu pen eu hunain, mae’r dynion hyn yn cynnig sefydlogrwydd, ymddiriedaeth a phresenoldeb i blant yn eu gofal.

Ac yn aml, yr eiliadau lleiaf sy’n golygu fwyaf. Boed hynny’n gicio pêl-droed yn yr ardd, helpu gyda gwaith cartref, neu eistedd gyda’ch gilydd ar ôl diwrnod hir, mae’r pethau bob dydd hyn yn meithrin ffydd dros amser. I rai plant, gall model rôl gwrywaidd cadarnhaol deimlo’n newydd, ac mae’r cysylltiadau hynny’n tyfu’n ofalus ar eu cyflymder eu hunain.

dyma lle mae angen mwy o ddynion.

Nid oherwydd bod un ffordd i faethu, ond oherwydd bod pob plentyn yn elwa o wahanol fathau o gefnogaeth, gwahanol bersonoliaethau a gwahanol brofiadau bywyd. Weithiau mae angen egni a chwarae. Weithiau mae angen amynedd a chysondeb. Yn aml, dim ond angen bod yno sydd.

ac nid oes rhaid i chi wneud hynny ar eich pen eich hun.

Yn Maethu Cymru Sir y Fflint, nid rhywbeth a gaiff ei gynnig un waith ac yna ei dynnu’n ôl yw cefnogaeth. Mae’n rhywbeth parhaus, ymarferol sydd wedi’i greu o gwmpas perthnasoedd go iawn. Yn ein cymuned ni, mae gofalwyr yn rhan o grŵp agos sy’n cefnogi ei gilydd mewn ffordd sy’n teimlo’n naturiol a chalonogol.

rydym hefyd yn cydnabod bod cysylltiad yn wahanol i bawb.

Dyna pam mae un o’n Gofalwyr o Ganolbwynt Mockingbird, Andy, wedi bod yn dod â gofalwyr maeth gwrywaidd at ei gilydd trwy sesiynau cymdeithasol hamddenol ac anffurfiol o’r enw “Social with Andy”. O daflu bwyeill a dartiau, i amser yn y maes ymarfer golff, mae’r eiliadau hyn yn rhoi lle i ofalwyr maeth i ymlacio, meithrin cyfeillgarwch a chysylltiadau a rhannu profiadau gyda phobl sy’n deall.

dywedodd Andy, gofalwr cartref canolbwynt Mockingbird yn Sir y Fflint:

“Rydw i’n hoffi’r digwyddiadau hyn oherwydd maen nhw’n hamddenol mewn awyrgylch llawn hwyl i ni ddynion gysylltu. Mae Maethu Cymru Sir y Fflint yn cynnal llawer o ddigwyddiadau, ond mae’n braf cael amser i ddynion yn unig gael seibiant ac ymlacio.”

dywedodd Graham, gofalwr maeth yn Sir y Fflint:

“Mae’n braf gwneud rhywfaint o feithrin tîm mewn ffordd wahanol. Mae’n hwyl ac mae’n braf dal i fyny.”

dyma sut beth yw maethu gydag awdurdod lleol. nid dim ond rôl, ond cymuned.

Felly os ydych chi erioed wedi meddwl am faethu, neu wedi meddwl a allech chi wneud gwahaniaeth, dyma eich arwydd i edrych eto.

Oherwydd weithiau beth sydd ei angen fwyaf ar blentyn… yw rhywun fel chi.

a allai maethu fod yn rhan o’ch pennod nesaf?

Os ydych yn byw yn Sir y Fflint, cysylltwch â Maethu Cymru Sir y Fflint a bydd aelod o’n tîm ymroddedig yn cysylltu â chi i gael sgwrs gyfeillgar heb rwymedigaeth i’ch helpu i benderfynu a yw maethu yn iawn i chi.

Os ydych yn byw yn unrhyw le arall yng Nghymru, ewch i Maethu Cymru i gael rhagor o wybodaeth ac i ddod o hyd i’ch tîm maethu awdurdod lleol.